ILOILO CITY – Ginkumpirma sang The Medical City- Iloilo nga yara sa nasambit nga medical facility naka admit ang labing una nga pasyente nga nagpositibo sa Coronavirus Disease 2019 (COVID-19) sa Iloilo.
Ang nasambit nga pasyente amo ang 65 anyos nga lalaki sang Guimbal, Iloilo kag may yara sang himata nga may travel history sa Japan.
Sa interview sang Bombo Radyo kay Dr. Felix Ray Villa, Chief Executive Officer sang The Medical City-Iloilo, iya ginpahayag nga duha na ka semana nga naka-admit ang pasyente.
Suno kay Villa, indi pa siya makahatag sang pahayag may kaangtanan sa kondisyon sang 65 anyos nga lalaki bangud sa hingyo sang pamilya.
Nagpasalig si Villa nga kontrolado nila ang sitwasyon bangud antes pa man gin-admit ang nasambit nga pasyente, ginsunod sang mga personnel ang nagakaigo nga protocol.
Wala sang may makasulod sa panalgan kun sa diin nahamtang ang pasyente kag iban pa nga Person’s Under Investigation magluwas lang sa medical personnel.
Hugot man nga ginapatuman ang 1 is to 1 sa diin isa lang ka personnel ang nagaatipan sa kada pasyente.
Nahibaluan nga sa subong, may yara sang tatlo ka Persons Under Investigation nga yara sa isolation sang hospital.
