Indi makahibalo ang mga tawo sa isa ka bangko sa Brazil kun makulbaan, madalagan, ukon malipong na insigida bangud sa isa ka eksena kun sa diin gindala sang isa ka babaye ang isa ka bangkay agud nga magpirma para sa iya loan.
Gin-identify ang bank customer nga si Erika de Souza Vieira Nunes. Nagalab-ot sa $3,400 ukon masobra P194,000 ang iya kuntani nga utangon sa bangko.
Sa nakit-an sa video, gina-buligan ni Nunes ang lalaki nga nagapungko sa wheelchair apang talalupangdon nga nagalungi na ang ulo sang tawo kag wala gid naga-steady apisar pila ka beses ini nga ginakaptan sang babaye.
Apisar sini, nagasige sa pag-istorya ang babaye kag ginatawag pa ang tawo nga “uncle”.
Iya ini ginapilit nga magpirma sa financial documents, kag ginapilit man sini nga ibutang ang ballpen sa tudlo sang tawo kag ginasilingan ini nga hugton ang pagkapot.
Sang ginmuno sang bank worker nga nagapalamuti na ang tawo kag posible nga indi maayo ang pamatyag sini, nagrason si Nunes nga amo gid ina ang kinaandan sang tawo kag wala ini nagahambal.
Bangud sa kakulba, nagtawag ang staff sang pulis.
Gilayon nga gin-aresto ang babaye.
Natumod man ang tawo nga amo si Paulo Roberto Braga, 68-anyos, nga pila ka oras na nga napatay antes ini gindala sa sulod sang bangko.
Magapadayon pa ang imbestigasyon suno sa pulis kun sa diin igalakip ang rason sang kamatayon sini, kun matuod nga hinablos sini ang babaye, kag kun involved ang iban pa nga himata sa amo nga aktwasyon nga nagtuyo nga magkomiter sang fraud sa bangko.
Sa bahin ni Nunes, mahimo ini pasakaan sang kaso nga fraud, embezzlement, kag pag-abuso sa bangkay sang isa ka tawo.#
