50 ka tuig makaligad ang katapusan nga Apollo moon mission, nagpalupad ang National Aeronautics and Space Administration ukon NASA sang megarocket kag space capsule sa panibag-o nga mission nga nagatuyo nga mapa-balik ang mga astronauts sa bulan.
Wala sang crew sa test flight nga gintawag nga Artemis I.
Ginpangalanan ini nga mission nga Artemis kasunod sa goddess sa Greek mythology nga amo ang twin sister ni Apollo.
Gintawag sang American space agency ang rocket nga “most powerful rocket in the world”. Sa ibabaw sanfg rocket amo ang Orion capsule nga amo ang ginalantaw nga magadala sang astronauts sa bulan.
Kun balikan ang maragtas, katapusan nga nagpadala ang Amerika sang astronauts sa bulan sang Apollo era ukon sang 1969-1972.
Subong nga 2022, ginalauman nga makatukod ini sang sustained presence sa bulan lakip na ang lunar space station agud makabulig sa pag-preparar para sa isa ka mission sa Mars.
Ini nga 26 ka adlaw nga flight sang Artemis 1 amo ang test flight sa Space Launch System rocket kag sa Orion capsule antes magpasakay sang mga tawo para sa mission.
Dala sang spacecraft ang set sang mannequins nga may sensors agud nga matun-an ang mga kondisyon sa tion sang byahe kag agud nga ma-measure ang radiation levels sa kabug-usan nga mission.
Ini nga Orion spacecraft ang magapadulong sa moon kag magapadayon sa pag-orbit sa sulod sang pila ka semana antes ini magbalik sa earth. Sa Disyembre 11, ginalauman nga magbalik ang capsule sa Pacific Ocean.
Ginpatigayon ini nga Artemis I mission matapos ang duha ka palpak nga attempts bangud sa technical reasons. Gin-delay man anay ang pagpalupad sini bangud sa malain nga tyempo lakip na ang Hurricane Ian nga nag-igu sa Florida sang katapusan nga bahin sang Septyembre.
Kun magmadinalag-on ini nga test flights kag ang masunod pa nga flights, mahimo na makapadala ang Amerika sang mga tawo sa bulan sa 2025.
Sa inisyal nga impormasyon halin sa NASA, kun magmadinalag-on ang Artemis 1, sundan ini sang Artemis II test flight nga tentatively scheduled sa 2024.
I-lakip sa amo nga mission ang apat ka astronauts sa Orion spacecraft para sa ginakalangkagan nga expedition sa bulan. Pagkatapos sini suno sa NASA, ilakip naman sa Artemis III flight ang una nga babayi kag first person of color nga amo ang makaabot sa bulan. ##
