CEBU CITY – Ginpaidalom sa lockdown ang Sitio Alaska sa Brgy. Mambaling sa syudad sang Cebu matapos na-record ang 533 ka kaso sang Coronavirus Disease 2019 (COVID-19).
Sa interview sang Bombo Radyo kay Mambaling Punong Barangay Atty. Gines Abellana, iya ginpahayag nga sa 80 ka barangay sa syudad, nagapanguna ang Mambaling sa numero sang kaso kag kalabanan sa sini nga kaso ang nagikan sa nasambit nga sitio.
Duha ukon tatlo lang ka kaso suno kay Abellana ang nagikan sa iban nga sitio sa Brgy. Mambaling.
Suno pa kay Abellana, may yara sang 4,812 ka pamilya sa amo nga sitio kag sa kabug-usan, masobra 22,000 ang numero sang residente.
Ini nga lugar suno kay Abellana ang ginpahamtangan sang mga squatters nagikan sa downtown sa syudad sang Cebu kag amo man ang ginatiniran sang Badjao Community.
Daku nga problema ang pagpatuman sang quarantine measures suno kay Abellana bangud tuman ka daku ang populasyon kag magagmay ang mga balay — rason nga indi matuman ang physical distancing measure.
May problema man sa pagpanghatag sang food assistance sa mga pumuluyo.
Aminado si Abellana nga kulang ang pondo sang barangay, kag apisar naghatag na ang local government unit (LGU) sang Cebu sang 1,000 ka sako sang bugas, kulang man gihapon ini sa mga residente.
Sa subong, may duha ka isolation facilities sa Sitio Alaska sa diin gina-atipan ang mga infected nga pasyente.
Suno kay Abellana, personal man siya nga nagapadulong sa amo nga sitio agud tsekyaron ang lugar partikular na ang Alaska Elementary School.
May mga medical practitioners man nga nakadesignar sa isolation facilities, kag suno sa punong barangay, tuman ka sako ang mga doktor kag nurse ilabi na bangud indi lang sa ila barangay ang problema.
Sa kabug-usan, santo sa data sang Department of Health Central Visayas Center for Health Development, ang syudad sang Cebu ang may yara sang 1,388 ka kaso sang COVID-19, samtang, 1,581 naman ang numero sang infected sa bug-os nga probinsya.
