Wala nagauntat ang trabaho sa Korte apisar ginlockdown ukon physically close tuga sang istrikto nga quarantine classifications.
Sa exclusive interview sang Bombo Radyo kay Judge Ma. Dianela Olmedo Ladrido, Presiding Judge sang Barotac Nuevo Municipal Trial Court, iya ginpahayag nga mahimo makafile sa gihapon sang kaso sa Korte sa tunga sang nagapadayon nga pandemya.
Suno kay Ladrido, bisan mando pa sang gobyerno nga ipasirado ang mga Korte bangud sa pamahog sang pandemya, wala man sa gihapon nagauntat ang ila nga trabaho.
Pahayag niya, kun may mga urgent cases, ginahimo sang Korte ang tanan nga masarangan agud indi madelay ang kaso sa diin nagalunsyar man sila nga mga judge sang video conferencing.
Dugang pa sang hukom, mahimo man makig-angot ang mga kliyente sa ila mga abogado via online ukon email may kaangtanan sa ila nga mga kaso.
Abiso ni Ladrido sa mga nagasulod sa Korte, magdisenfect sang mga kamot, magsuksok sang facemask kag faceshield kag kun magsulod na sa court room, nagakadapat mag-obserba sang physical distancing.
