Nasapwan nga naga-utaw utaw sa suba kag wala na sang kabuhi ang isa ka katapo sang Philippine Army sa Sitio Agutayan, Brgy. Cubay, San Enrique, Iloilo.
Ginkilala ini kay Sergeant Ronald Bajade, 34, residente sang Barangay Rumagayray sang amo man nga banwa, ginapahayag trainer sang scout rangers sa Jamindan, Capiz, kag assigned man anay sa 94th Infantry Battalion (IB) sa Negros Occidental.
Sa interview sang Bombo Radyo kay Pol. Major Gilbert Baldevarona, hepe sang San Enrique Municipal Police Station, iya ginpahayag nga Agosto 12 pa sang katapusan nga nakatawag si Bajade sa iya nga asawa, kag nagpanugid nga nagpundo siya anay sa Mambusao, Capiz bangud mabaskog ang ulan.
Sang amo nga tion, halin si Bajade sa Jamindan, Capiz.
Agosto 14, nagpa-blotter na ang misis bangud wala nakapuli si Bajade sa ila nga balay.
Kahapon man sang nasapwan ang iya nga motor kag cellphone sa ove flow sa Barangay Agutayan, San Enrique.
Ginapatihan sang mga pulis nga ginpilit ni Bajade nga magtabok sang gab-i nga manugpauli na ini kag posible nahulog sa overflow sa Sitio Lagtang, Brgy. Mapili, San Enrique.
Naga-plano ang pamilya ni Bajade nga ipaidalom sa autopsy ang iya nga bangkay.
