Nagpamatok gid ang transport cooperatives kag taxi operators sa Iloilo City sa pagpasulod sang mga Blue Taxis sa syudad.
Ini matapos gin-grant sang Land Transportation Franchising and Regulatory Board (LTFRB) ang operasyon sa syudad sang kapin 100 units sang taxi sang duwa ka Davao -based companies.
Suno sa mga asosasyon sang mga taxi operators, ginkibot lang sila sa desisyon kag wala sila ginkonsulta antes gin-aprobahan ang aplikasyon sang Blue Taxis.
Sa interview sang Bombo Radyo kay Raymundo Parcon, Chairman sang Western Visayas Transport Cooperative (WVTC), indi sila magpasugot sa pagsulod sang Blue Taxis bangud damo na ang mga existing taxis sa Iloilo City kag amo man ang presensya sang mga Grab units.
Nagpabutyag man ang iban nga transport cooperatives nga naga-operate kaangay sang PUJ (public utility jeepneys), bangud posible nga maapektuhan ang ila biyahe kag pangabuhian.
Suno kay Parcon, kung padayunon pa ang pagdugang sang mga bag-o nga taxi units, mas mangin mabudlay para sa mga kasubong nila nga traditional taxi operators nga maki-pagkompetensya bangud nagakaapektuhan ang transport sectors sa syudad.
