Nagagwa sa imbestigasyon nga traumatic head injury ang nangin rason sang kamatayon sang 15-anyos nga solterito nga nasapwan sa kilid sang dalan sa Barangay Balud Lilo-an, Zarraga, Iloilo.
Sa interview sang Bombo Radyo kay Police Major Beverly Cataluña, hepe sang Zarraga Municipal Police Station, iya ginpahayag nga sandig sa resulta sang autopsy, posible nga nakuha ini nga injury paagi sa pagsumbag.
Suno sa hepe, nakit-an sa likod sang ulo sang bata nga may kaangay kadaku sang inumol nga naghubag na. Posible suno kay Cataluna nga isa tubtub tatlo ka adlaw na halin sang naangkon sini ang injury kag posible nga ginadala-dala lang sang bata ang sakit antes ang iya kamatayon.
Suno pa sa hepe, ginabalikan nila subong kun ano ang nangin mga aktibidad sang bata antes ini nasapwan nga wala sang kabuhi.
Kun may matipon na nga mga ebidensya suno sa natungdan, mapasaka na ang kaso batok sa mga responsable.
Matandaan nga nakit-an ang biktima nga residente sang Barangay Talauguis, Zarraga sang Lunes, Agusto 31, sang pasado alas sais sa aga.
Sang adlaw nga nakit-an ini, may scratches ukon gasgas ini sa tuhod kag sa tudlo, apang wala na sang maathag nga external injuries nga makapaathag sang iya kamatayon.
Una na nga ginpahayag sang Lola sang menor de edad nga gin-pitchikurno ang iya apo sa tangkugo sang nagligad nga semana apang wala ini sila sang ihibalo kun sin-o nga estudyante ang naghimu sini sa iya.#
