Nagmando ang trial chamber sang International Criminal Court nga ipabilin sa detensyon sa The Hague si anay President Rodrigo Duterte bangud sa dako nga posibilidad nga mapalagyo ini antes sang iya trial sa kaso nga crimes against humanity.
Nahibaluan nga ginbalibaran sang korte ang iya pangabay nga temporaryo nga makaguwa sa detensyon bangud wala sini ginakilala ang hurisdiksyon sang ICC kag gintawag pa niya nga “kidnapping” ang iya pagkaaresto.
Suno sa mga hukom, mas nagtaas ang posibilidad nga magtago ini ukon magpalagyo ang anay Presidente.
Nagpanawagan naman ang depensa ni Duterte nga dapat ini anay temporaryo nga paguwaon bangud sang iya edad kag mga masakit sa lawas.
Apang suno sa ICC, maayo man ang pagmonitor kag pag-atipan sa iya kondisyon sa sulod sang detention center.
Nakatalana nga pagahiwaton ang status conference sang trial chamber sa Mayo 27 samtang wala pa sang pinal nga petsa para sa iya trial.
