ILOILO CITY – Aminado ang Tribu Molave sang Brgy. Rizal Estanzuela, Iloilo City nga mabudlay tipunon ang mga tribe warriors para sa practice sa ila pagpasakop sa palabuton nga Dinagyang 2020.
Sa interview sang Bombo Radyo kay Mark Distura Bernaldez, choreographer sang tribu, iya ginpahayag nga ang ila 55 ka mga warriors ang naghalin pa sa nagkalain-lain nga barangay kag ginalakipan sang mga estudyante, out-of-school youth, kag may yara man nga may trabaho na.
Suno kay Bernaldez, nangin hangkat ini sa grupo lakip na ang pagtudlo, apang iya gin-athag nga ginatinguhaan sang tanan nga mahatag ang pinakamaayo nga performance.
Bangud sini, adlaw-adlaw sila nga naga-practice.
Ginpahayag man sang natungdan ang ila excitement sa liwat nga pagbalik sang mga barangays sa kompetisyon sa Dinagyang bangud nahatagan sang kahigayunan ang mga pamatan-on sa ila lugar nga makapasakop.
Dugang pa sang natungdan, ini ang ginahimo sang grupo sa ngalan sang pagtahod kay Senior Sto. Niño.
Nahibaluan nga kapin 20 na ka tuig nga natukod ang Tribu Molave.
