Ginakaalarma sang Department of Health (DOH) ang nagapanglakaak nga numero sang kaso sang tuberculosis infection sa Pilipinas nga nagdangat sa 612,534 sang nagligad nga tuig.
Suno kay Health Secretary Ted Herbosa, sang 2023, naka-rekord ang Pilipinas sang 549 tuberculosis cases sa kada 100,000 nga populasyon ngas mataas ipaanggid sa case notification rate nga 439 cases per 100,000 population sang 2022.
Gin-report man sini nga 10,426 ka mga tawo nga may tuberculosis ang napatay base sa data sang Integrated Tuberculosis Information System. Apang gin-athag sini nga indi tanan ang napatay direkta bangud sa amo nga infectious disease.
Dugang pa sang tiglikom, indi lamang problema sa ikaayong lawas ang tuberculosis apang nahimo na nga socioeconomic problem bangud naapektuhan sini ang pigado nga mga tawo.
Lakip sa tuyo sang DOH amo nga tapuson ang tuberculosis sa Pilipinas pag-abot sa 2030, apang bangud endemic na ini nga balatian sa Pilipinas, mas tutukan na lang suno sa iya ang pag-angkon sang 100% sang mga may tuberculosis nga ma-diagnose.
Ang ikaduha nga tuyo amo nga mapabulong ang 99% sang mga na-diagnose nga may amo nga balatian.
Kinahanglan man ang prevention sang balatian kag mahimo ini paagi sa bakuna nga maga-guwa sa 2028, ukon mahimo man paagi sa treatment sa family members nga na-expose sa household.
Una na nga ginpahayag ni Herbosa nga ginalantaw sini nga kakason ang pangalan sang Pilipinas sa Top 10 list sang mga pungsod nga may pinakamataas nga numero sang kaso sang tuberculosis sa pagtakop sang iya termino sa DOH.
Ang tuberculosis, suno sa World Health Organization (WHO), amo ang makalalaton nga balatian nga masami nagaapekto sa baga kag nagalapta paagi sa hangin ukon kun mag-ubo, magpangatsi, ukon magdupla ang infected nga tawo.
Lakip sa mga sintomas sini amo ang madugay nga pag-ubo, pagpalanakit sa dughan, kakapoy, hilanat, kag pagbuhin sang bug-at.#
