ILOILO – May yara na sang kompleto nga detailed plan kag program of work ang General Services Solid Waste Management Office para sa Material Recovery Facility sang tatlo sa pinaka dako nga merkado sa syudad sang Iloilo nga amo ang Iloilo Terminal Market, Iloilo Central Market kag Jaro Big Market.
Sa interview sang Bombo Radyo jay Engr. Niel Ravena, Asst. Department head sang General Services Office iya ginpahayag nga ang nasambit nga programa ang ginalantaw nga sabat sa madugay na nga problema sa basura sa mga merkado sa syudad.
Suno kay Ravena indi lang ini para sa mga merkado bangud mahimo man nga maka akomodar ini sang mga malapit nga barangay nga wala sang lugar nga pahamtangan sang ila mga Material Recovery Facilities.
Dugang sang natungdan, ini man ang aprubado sang Deparment of Environment and Natural Resources kag Environment Management Bureau.
Santo sa pahayag ni Ravena, makabig nga pinasahi ang nasambit nga MRF kun ipaanggid sa desinyo subong bangud may yara ini sang atop agud kun mag ulan indi mag tagas ang duga sang basura, may yara man ini sang pader, tiles, drainage system, storage facilities kag segregation cabinets.
Ginpahayag ni Ravena nga pagabutangan man ini sang Organic Shredders para sa mga organic material bag o hakuton sang dump truck pakadto sa Calajunan Dump site nga gamiton para sa composting project sang syudad.
Dugang pa, may yara ini sang nakatalana nga P1.8 milyon nga pondo kag ginalauman nga maumpisahan na sa 1st quarter subong nga tuig kag matapos subong nga bulan sang Marso.
