Ginbuyagyag sang World Health Organization (WHO) nga ang pinaka-ginakahangaw-an nga sitwasyon kasunod sang linog sa Turkey kag Syria amo ang mga residente sa northwestern Syria, isa ka rehiyon nga kontrolado sang mga rebelde kag wala pa halos nasudlan sang bulig.
Ginabanta apat ka milyon nga Syrians ang nagapuyo sa amo nga rehiyon.
Sang natabo ang linog, ang local rescue organization lamang ang nagbulig sa mga biktima bangud wala sang nagsulod nga international aid indi kaangay sa nag-abot sa Turkey.
Suno kay WHO Director General Tedros Adhanom Ghebreyesus, naghingyo na ang health body kay Syrian President Bashar al-Assad nga buksan ang dugang nga border crossings sa Turkey agud mapat-od man nga makabaton man sang buligan ang taga-northwestern Syria.
Sa subong, naglapaw na sa 41,000 ang patay sa Turkey kag Syria kasunod sang 7.8 kag 7.6 magnitude nga linog.
Una naman nga ginkumpirma sang Department of Foreign Affairs (DFA) nga wala sang Filipino fatality sa Syria samtang duha naman ang Pinoy casualties sa Turkey. ##
