Nagsapol na ang Iloilo City Government sa MORE Electric and Power Corporation (MORE Power) kag sa Task Force on Public Utilities Group of Iloilo (PUGI) may kaangtanan sa plano nga ipatuman ang underground power distribution system ukon ang underground electric wires sa syudad.
Kasunod ini sang ginpasar nga resolution sa Iloilo City Council agud hingyuon sa MORE Power nga ipanglubong na ang cables kag wires sa Calle Real kun sa diin makit-an ang heritage buildings sang syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga mas patahumon pa sini ang syudad sang Iloilo kag makabulig man ini sa turismo bangud madula na ang nagakabit nga mga kuryente nga masabad sa mata.
Apang ginpahayag sang alkalde nga kun matapos na ang design kag ma-finalize na ang gastuhon kag ang agreement sa telecommunication companies (telcos), kinahanglan pa ini nga pa-aprubahan sa Energy Regulatory Commission (ERC).
Suno naman kay Francis Cruz, head sang Information Technology (IT) Division sang Iloilo City Government, iya ginpahayag nga ang MORE Power ang responsable sa desinyo.
Sa inisyal nga nahambalan, maga-umpisa ang underground cabling sa Plazoleta Gay tubtub sa Libertad Plaza.
Plano man suno kay Cruz nga ipang-lubong ang mga kable sa palibot sang mga plaza.
Paagi sini suno sa natungdan, mahipid, matahum, kag safe pa para sa publiko bangud wala na nagakabit ang mga kuryente kun maglabay ang mga tawo.
