ILOILO CITY – Nagpakigkita si United States Vice President Kamala Harris kay Presidente Ferdinand Marcos, Jr. sa palasyo sang Malacañang subong nga adlaw.
Gin-emphasize ni Harris ang madugay kg padayon nga relasyon sang Estados Unidos sa Pilipinas.
Ginpasalig man niya si Marcos nga ang pag-address sa problema sa seguridad sa Asia-Pacific region ilabi na sa West Philippine Sea.
Dugang pa sang bise presidente, ang ano man nga pagpang-atake sa Philippine military kag subong man sa public vessels kag aircraft ang makapahulag sang United States mutual defense commitment.
Sa bahin naman ni Marcos, ang pagbisita ni Harris sa pungsod ang isa ka mabaskog nga simbolo sang padayon kag mabaskog nga relasyon sa Estados Unidos.
Dugang pa niya, ang relasyon sang pungsod sa superpower country ang nag-agi man sa nagkalain-lain nga pagtilaw kag nagpapag-on pa sini.
Ang duha ka lider ang ginalauman nga mag-istorya may kaangtanan sa posible collaboration agud nga ma-address ang mutual concerns sa climate crisis kag investments sa renewable energy kag clean power.
Una na nga gin-anunsiyo sang White House nga ang Estados Unidos kag ang Pilipinas ang magasugod na sa pag-discuss sa civil nuclear cooperation agreement nga makagiya sa future sales sang US nuclear reactors sa pungsod.
Buwas naman, Nobyembre 22, bisitahon sini ang Palawan, ang teritoryo sa Pilipinas nga isa sa pinakamalapit sa West Philippine Sea.
Si Harris ang highest ranking American official ang una nga nagbisita sa Pilipinas sang nagsugod ang administrasyon ni Marcos sang Hunyo.
