ILOILO CITY – Magapadulong sa Pilipinas subong nga adlaw, Enero 18 tubtob 21 si United States Assistant Secretary of State Daniel Kritenbrink nga amo ang in charge sang East Asian and Pacific Affairs.
Ini ang gin-anunsiyo sang Department of State.
Updan ni US delegation co-chair Defense Deputy Assistant Secretary Lindsey Ford si Kritenbirk sa pagpadulong sa pungsod.
Magatambong si Kritenbirk sang 10th US-Philippines Bilateral Strategic Dialogue kun sa diin, makigkita ini sa mga Filipino diplomatic kag defense officials.
Ang dialogue ang may katuyu-an nga mapabaskog pa ang alyansa sang Pilipinas kag Estados Unidos nga nagatutok sa areas sang mutual interest lakip na ang pagpabilin sang matawhay kag bukas nga Indo-Pacific, pag-address sang global challenges, pagpabaskog sang bilateral kag regional economic cooperation kag pagpabaskog pa sang people-to-people ties.
Makigkita man ang opisyal sa mga local civil society leaders kag mga estudyante agud hambalan ang mga polisa sang Estados Unidos sa Indo-Pacific region.
Siya ang ginalauman nga magpasiguro sang commitment sang Estados Unidos nga magbulig sa Pilipinas sa pag-develop sang quality digital infrastructure.
