Ginkontra ni Presidential Communications Office Undersecretary Claire Castro ang pahayag ni Senator Sherwin Gatchalian nga nagapangatubang na sang krisis sa gatong ang pungsod bangud sa padayon nga pagtaas sang presyo sang mga produktong petrolyo.
Suno kay Castro nga indi pa matawag nga oil crisis ang sitwasyon subong bangud wala pa ginakulang ang suplay sang Pilipinas sa langis.
Dugang pa sini nga may ginapaabot nga diesel sa masunod nga semana, nga ginbakal sang Department of Energy halin sa kaiping nga mga pungsod sa Asya.
Nagpasalig naman si Castro nga padayon ang ginahimo nga negosasyon sang gobyerno, agud nga indi magkulang ang supply sang produktong petrolyo sa pungsod.
Apisar sang amo nga paathag ni Castro, ginakabalak-an sa karun sang mga pumuluyo ang panibag-o nga big-time oil price hike sa Martes, Marso 24.
