GUIMARAS– Nagpaguwa sang memorandum ang Bise Governador sang Guimaras tuhoy sa social media posting sang mga nagatrabaho sa Local Government Unit.
Sa interview sang Bombo Radyo kay Vice Governor John Edward Gando, iya ginpahayag nga ang nasambit nga memorandum ang may tinutuyo nga kun may yara sang problema, reklamo sa kaupod sa trabaho ang isa ka empleyado, ipaagi ini sa grievance machinery kag indi sa pagpabati-bati sa social media.
Suno kay Gando, malaw-ay para sa bahin sang mga nagatrabaho sa gobyerno nga gina-post sa social media ang mga hibubun-ot tuhoy sa trabaho.
Gin-athag man ni Gando nga wala pa sang kaangay nga kaso sa bahin sang Sannguniang Panlalawigan sang Guimaras apang kun may yara gid man, ipaagi ini sa grievance machinery.
Nahibaluan nga sa nasambit nga memorandum, kinahanglan nga ilista ang email address, telephone number kag facebook account sang mga empleyado sang Probinsya.
