Nagpangabay si Vice President Sara Duterte sa Senado nga ibasura ang mga impeachment articles batok sa iya.
Pahayag sang Bise Presidente nga wala nagatuman sa mga probisyon sang Konstitusyon ang amo nga impeachment articles kag kulang ini sang nagakaigo nga ebidensya.
Sa sabat ni Duterte sa kontrobersyal nga mga pahayag sini sang 2024 nahanungod kanday President Ferdinand Marcos Jr., First Lady Liza Araneta-Marcos, kag anay House Speaker Martin Romualdez nga suno pa sa iya isa ato ka freedom of expression kag indi makabig nga matuod nga pagpamahog.
Ginpahayag man sang abogado sang Bise Presidente nga wala sang ebidensya nga nagapakita nga nagbayad ukon nagplano ini nga magkuha sang assassin.
Gindeny man sini ang akusasyon nga gin-abuser sini ang masobra ₱600 milyon nga confidential funds halin sa Office of the Vice President kag Department of Education.
Ginkwestyon man sang iya kampo ang kredibilidad sang testigo nga si Ramil Madriaga, kag ginpahayag nga ang mga Notices of Disallowance sang Commission on Audit indi pa pinal.
Ginpahayag man nila nga wala sang ebidensya nga personal nga nakabenepisyo si Duterte sa pondo.
Nahanungod naman sa alegasyon sang wala nadeklarar nga manggad sang Bise, ginkwestyon sang iya mga abogado ang paggamit sang mga report sang Anti-Money Laundering Council kag mga akusasyon ni anay Senador Antonio Trillanes IV, nga nagalapas sa bank secrecy laws.
Ginpahayag man sini nga wala siya gin-imbestigaran sang AMLC.
Gindeny man ni Duterte ang alegasyon sang graft and bribery kag ginpahayag nga wala sang testigo ukon ebidensya nga nagapakita nga ginpondohan sini ang cash payments agud maimpluwensyahan ang procurement sa Department of Education.
Nahibaluan nga ang impeachment trial sa senado nakatalana nga pagabuksan sa Hulyo 1, 2026, kag ini na ang mangin ikatatlo nga impeachment trial sa Pilipinas, sunod sa kaso ni anay Presidente Joseph Estrada sang 2001 kag anay Chief Justice Renato Corona sang 2012 sa bilog nga kasaysayan sang pungsod.
