ILOILO CITY- Hugot nga ginpanindugan sang mga lideres sang House of Representatives nga wala sang plano nga i- impeach si Vice President Sara Duterte sa pihak sang pagpati sini nga may nagapadihot na agud pahalinon ini sa pwesto.
Sa isa ka briefing, ginpahayag ni House Deputy Majority Leader Erwin Tulfo nga kun ginasiling ni Duterte nga nagasapol ang House leaders tuhoy sa iya impeachment, wala ini sang kamatuoran bangud ang ila meeting sa Malacañang sang damlag lang ang natuhoy sa slate sang Marcos administration para sa 2025 senatorial race.
Suno kay Tulfo, wala gid ini sang ihibalo kun sa diin ginkuha ni Duterte ang impormasyon kag mangin ang Office of the Speaker ang hugot man nga nagapanginwala sa plano nga i-impeach si VP Sara.
Ang ginatumod ni Tulfo amo ang meeting sa Malacañang, kun sa diin ang partido ni President Ferdinand Marcos Jr. nga Partido Federal ng Pilipinas, partido ni Speaker Ferdinand Martin Romualdez nga Lakas-CMD, ang Nationalist People’s Coalition (NPC), Nacionalista Party (NP), kag National Unity Party (NUP) ang yara sa pagsinapol.
Nahibaluan nga kadungan sang Senate deliberations sa Office of the Vice President’s (OVP) proposed budget para sa 2025, ginmitlang ni VP Sara ang possible impeachment nga ginadiskusyunan sa kamara.
Dugang ni Duterte, ang impormasyon naghalin sa iya mga abyan.
Ang ginatumod niya amo ang House quad-committee hearings sa diin ang iya bana nga abogado nga si Manases Carpio, kag utod nga si Davao City 1st District Rep. Paolo Duterte ang gin-ulamid sang former Customs officer nga involved sa isa ka missing drug shipment sang 2018.
Suno pa kay Duterte, wala ini nabalaka sa impeachment bangud handa man siya nga bayaan ang iya pwesto sa bisan ano nga oras.
Nahibaluan nga indi ini ang una nga bes nga gintalakay ang possible nga impeachment ni Duterte.
Sang Agusto 13, ginpanginwala man ni Ako Bicol party-list Rep. Raul Angelo Bongalon ang pahayag ni former presidential spokesperson Harry Roque nga ginapreparar na ang impeachment complaint batok sa bise presidente.
Suno kay Bongalon, apisar indi makakilibot kun may tawo nga mag-file sang impeachment complaint batok sa Vice President, apang wala pa siya sang nabatian tuhoy diri.
