ILOILO – Tun-an sang Philippine Institute of Volcanology and Seismology (PHIVOLCS) ang posible pagtuhaw sang panibag-o nga fault sa San Enrique, Iloilo nga amo ang ginatumod sentro sang nagluntad nga 4.8 magnitude nga linog kagab-i, Disyembre 26.
Sa interview sang Bombo Radyo kay Engineer Rey Antioquia sang Philippine Institute of Volcanology and Seismology (PHIVOLCS) Roxas, iya ginpahayag nga sa subong, indi pa matumod sang pamunuan kun bala, separado ukon naglisa lang ang fault nagikan sa West Panay Fault.
Apang, pahayag sang opisyal, tuman kalayo ang sentro sang linog sa West Panay Fault amo nga mas daku ang posibilidad nga nagtuhaw ini.
Dugang pa, suno kay Antioquia, wala sang lauman nga aftershocks ukon tsunami sa natabo nga pagtay-og.
Gin-athag man ni Antioquia nga sandig sa ginpaguwa nga Earthquake Information Number 2 sang ahensiya, indi sa Dumarao, Capiz ang epicenter sang linog nga amo ang una nga impormasyon nga nag-abot sa publiko.
Paathag sang opisyal, nagakatabo ang pag-update sang impormasyon bangud sa pagsulod sang dugang nga data nagikan sa mga sensor sang PHIVOLCS.
Nahibaluan man nga tectonic in origin ang linog amo nga malapad ang scope nga nalab-utan sini.
