ILOILO – Nagpatigayon na sang trainings kag dugang nga mga orientations ang West Visayas Medical Center sa ila mga medical personnels bilang kabahin sang ila pagpanghanda sa nagapadayon nga Novel Coronavirus scare sa pungsod.
Sa interview sang Bombo Radyo kay Dr. Joselito Villaruz presidente sang West Visayas State University iya ginpahayag nga padayon na ang ila pagpanghanda sa posibilidad nga pagbaton nila sang mga pasyente nga ginasuspetsahan ukon apektado na sang Coronavirus.
Suno kay Villaruz, mas ginaprayoridad nila subong kag mas ginahatagan sang igtalupangod ang West Visayas Medical Center bangud man sa padayon nga pagpamahog sang nasambit nga virus sa pungsod kag sa Western Visayas.
Dugang sang natungdan, may yara na sila gintalana nga holding areas sa bag o nga emergency room sang nasambit nga ospital para sa mga person under investigation lakip man ang isolation room kag admission rooms sa mga apektado sang nasambit nga virus.
Santo sa pahayag ni Villaruz, plano man nila nga magpatigayon sang educational campaign natuhoy sa Coronavirus sa mga komunidad kag mga health workers sa bulig man sang College of Nursing kag College of Medicine sang nasambit nga unibersidad.
Sa bahin naman sang mga estudyante sa West Visayas State University, ginpahayag ni Villaruz nga sa subong wala pa sila sang ginapatigayon nga lihok sa pagmonitor sa mga estudyante kag malikawan nga malatnan sila sang nasambit nga virus apang nagapati ang natungdan nga dako ang nangin papel sang social media sa pagpalapnag sang impormasyon natuhoy sa Coronavirus.
Nagapati man ang natungdan nga well informed na ang tanan nga estudyante kun ano ang dapat nila ubrahon agud makalikaw nga ma latnan sang nasambit nga virus.
Dugang pa, nakita man niya nga kalabanan sa mga estudyante ang naga mato-mato nalang pangita sang paagi agud maprotektahan ang ila kaugalingon batok sa virus kaangay nalang sang pagsuksok sang mask kag pagsunod a proper hygeine.
Nagpasalig naman si Villaruz nga mas pasangkaron pa nila ang pagmonitor kag pagpanugyan sa mga estudyante agud malikawan nga malatnan sila sang Coronavirus.
