ILOILO CITY – Nagademand si Iloilo City Mayor Jerry Treñas sa Department of Health nga hatagan sang test kits ang syudad sang Iloilo kag Western Visayas sa kabug-usan agud makapatigayon sang testing sa mga pasyente nga makitaan sang sintomas sang Coronavirus Disease 2019.
Sa interview sang Bombo Radyo kay Mayor Treñas, magluwas sa wala sang test kits sa syudad wala man sang mga accredited nga ospital nga magatest sang mga pasyente nga makitaan sang sintomas sang nasambit nga virus.
Suno kay Treñas, katungdanan na kuntani sang Department of Health ang pagpanghatag sang test kits sa tanan nga rehiyon sa bilog nga pungsod.
Nagapati ang alkalde nga dako ang mabulig sang mga test kits sa pagpanubo sang kaso sang COVID-19 sa syudad kag sa Western Visayas sa kabug-usan.
Dugang sang natungdan, tinghuaan man nila sa Local Government Unit nga tumanon ang ila tagsa ka mga katungdanan agud ma protektahan ang mga pumuluyo batok sa pagpamahog sang COVID-19 sa syudad sang Iloilo.
Sa diin nakapamakal na sila sang mga masks, alcohol kag Personal protective equipment nga mahimo gamiton sang mga health workers sa syudad.
Nagpasalig ang Iloilo City Government kaupod man ang Department of Health nga ubrahon ang tanan nila nga masarangan agud masiguro ang health safety sang tanan nga mga pumuluyo sa syudad.
Naghingyo man sang kooperasyon si Mayor Treñas sa mga pumuluyo nga sundon ang mga ginapatigayon nila nga preventive measures.
Lakip man diri ang mga ginapagwa nga pagsulundan nga ginapagwa sang Department of Health kaangay nalang sang proper hygeine.
Ginpabugal man sang alkalde nga isa ang Iloilo sa mga syudad nga nakapreparar sang temprano batok sa Coronavirus scare.
