Ginkumpirma sang World Bank nga ang Pilipinas opisyal na nga isa ka upper-middle-income country matapos ang Gross National Income (GNI) per capita sini nga naglab-ot sa $4,850, nga mas mataas sa gintalana nga $4,636 nga threshold.
Suno sa Department of Economy, Planning, and Development (DEPDev), ang ini nga pag-uswag ang resulta sang maayo nga ekonomiya, maayo nga pagpamalakad sa macroeconomy, kag mga structural reforms.
Nagtaas man ang average sang ekonomiya sa 5.8% halin 2021 tubtob 2025, samtang ang GNI per capita nagtaas sang 8.5% sa 2025.
Ginapaabot sang mga opisyal nga ang bag-o nga status magahatag sang mas maayo nga credit outlook, mas mataas nga kumpiyansa sang mga investors, kag magabukas sang dugang nga de-kalidad nga mga investors kag trabaho.
Apang posible man nga maghinay-hinay ang pila ka low-interest development loans tungod sa bag-o nga klasipikasyon.
Ginpunto man sang DEPDev nga apisar importante ini nga milestone, nagapabilin ang mga palaligban kaangay sang indi patas nga distribusyon sang kita.
Tinutuyo naman sang gobyerno nga ang pag-uswag mangin mas inklusibo kag mabuhinan ang pagsalig sa trabaho sa iban nga pungsod paagi sa pagpatindog sang mas madamo nga dekalidad nga mga trabaho sa sulod sang Pilipinas.
