Dugangan sang Western Visayas Transport Cooperative (WVTC) ang units sang mga jeep nga ila ipa-byahe sa mga ruta sa syudad sang Iloilo kun makabaton na sila sang ayuda halin sa Department of Transportation (DOTr).
Sa interview sang Bombo Radyo kay Mr. Raymundo ‘Boyet’ Parcon, chairman sang amo nga transport group, iya ginpahayag nga posible nga subong nga semana na magatupa ang amo nga ayuda nga makabulig sa ila sa tunga sang tuman ka daku nga pagsaka sa presyo sang gatong.
Suno kay Parcon, ginapaabot nga tag-P10,000 nga fuel cash aid ang mabaton sang tagsa ka operator samtang tag-P5,000 naman para sa drivers.
Madumduman nga bangud sa kulang nga suporta halin sa gobyerno kag indi na makasarang sa pagpanglakaak sa presyo sang gatong, una na nagpahayag ang kooperatiba nga buhinan nila ang units nga magabyahe sa syudad.
Magluwas sa fuel subsidy halin sa DOTr, nakabaton man ang mga myembro sang WVTC sang coupons halin sa Iloilo City Government para sa P1,500 nga balor sang produktong petrolyo nga ihatag sa weekend.
Pila man sa ila myembro ang mangin benepisyaryo sang tag-P5,000 cash assistance halin sa Department of Social Welfare and Development (DSWD). Ini ang expansion sang programa nga nagalakip na sang public utility jeepney (PUJ), taxi, kag transport network vehicle service (TNVS) drivers kasunod sang initial rollout sang Myerkules nga eksklusibo lang para sa tricycle drivers and operators sa tatlo ka syudad sa Western Visayas.
Sa pihak sini, gintawag ni Parcon nga “band aid solution” lamang ang subsidiya nga ginahatag. Ginsulit sini nga ang ila ginapangayo sa gobyerno amo nga aprubahan ang pagpasaka sang plete.
“Indi solusyon ang fuel subsidy sa amon problema subong,” suno kay Parcon. Subong gani, negative kami kada adlaw. Amo na hambal ko sang nagligad nga nagapamyerdehan kami sang sobra P100,000 kada adlaw.”
Pahayag sini, wala pa sila sang update nga nakuha gikan sa Land Transportation Franchising and Regulatory Board Region VI apisar nga lapitanay lang ang ila opisina.
“Ginahulat-hulat namon ang approval sang DOTr kay bisan lima lang tani ka pesos [nga fare hike], pero makadugang-dugang tani sa amon kita,” dugang sini.
Matandaan nga sang nagligad nga bulan, nagpatigayon man ang mga transport cooperative sa Iloilo City sang transport strike agud nga ipanawagan ang amo nga kawsa.#
