Gintawag ni Senate President Juan Miguel Zubiri nga daan na nga istorya ang liwat nga pagmuno sang United Nations – Human Rights Council sa Pilipinas bangud sa “war on drugs” kag sa report sang extrajudicial killings.
Sa baylo nga maghatag sang reaksyon sa pag-call out sang council sa Pilipinas, nagpangabay na lang si Zubiri sa media nga buligan man ang gobyerno nga panamion ang imahe sang Pilipinas.
Ginmuno ni Zubiri ang media killings sa pungsod lakip na ang matunog nga kaso sang pagpatay sa brodkaster nga si Percy Lapid.
Para kay Zubiri, tuman ka dasig ang pagsolbar sa kaso ni Lapid bangud isa pa lang ka bulan, natumod na suno sa iya kun sin-o ang mastermind.
Kaangay sa kaso ni Lapid, nagahulag man suno sa senador ang kaso kay former Senator Leila de Lima.
Diri na kag ginsal-ot ni Zubiri ang papel sang media sa imahe sang Pilipinas.
Mas maayo suno kay Zubiri nga buligan man sila nga i-announce sa kalibutan nga nadakpan na ang nagtiro kay Lapid kag lapit na lang nga madakpan ang mastermind.
Ginsiling ni Zubiri nga may free media sa Pilipinas rason nga mabatian ang mga reklamo sang mga tawo.
Apang ginmuno man sini nga sa Malaysia kag Vietnam, wala ginapalayag sa kahanginan ang ginapanghambal nga malain nga bagay batok sa gobyerno.
