ILOILO CITY- Naglunsar na sang kampanya ang Atin Ito Coalition kadungan sang pagpatuman sang China sang “no trespassing” policy umpisa subong nga adlaw.
Sa bag-o nga regulasyon sang China, ginhatagan sang otoridad ang Chinese Coast Guard nga i-detain ang kutob sa mga foreigners nga magasulod sa ila teritoryo kag mahimo ma-detain sang tubtub sa 60 ka adlaw ang madakpan nga trespasser kag indi na pagpaidalom sa trial.
Sa interview sang Bombo Radyo kay Ed Dela Torre, convenor sang Atin Ito Coalition, iya ginpahayag ang ila inisyatibo sa idalom sang bag-o nga kampanya amo ang pagpahamtang sang payaw ukon fish-aggregating device sa sulod sang exclusive economic zone sang Pilipinas.
Suno kay Dela Torre, ini ang ila alternatibo sa una nila nga ginhimo nga civilian mission sa West Philippine Sea sang Mayo.
Pahayag ni Dela Torre,ang ila tikang subong amo nga i-challenge ang China kun i-harass sini sa gihapon ang mga Filipino nga manugpangisda.
Dugang niya,sa subong, nagapangita na sila sang pondo agud masuguran ang paghimo sang mga payaw.
Wala naman ginadula ni Dela Torre ang liwat nga pagpatigayon sang civilian mission apang kinahanglan nga indi sila magpadaso-daso kag nagakadapat nga organisado man ang ila mangin tikang.
