ILOILO CITY – Naglab-ot sa 107 gikan sa 133 ka Local Government Unit sa Western Visayas ang nakapanghatag na sang cash assistance sa idalom sang Social Amelioration Program sang Department of Social Welfare and Development.
Sa interview sang Bombo Radyo kay Department of Social Welfare and Development 6 Director Ma. Evelyn Macapobre, iya ginpahayag nga sa record, apat pa lang ka Local Government Unit sa rehiyon ang may 100% sa pagpanghatag sang cash assistance nga ginalakipan sang Belison, Culasi, Laua-an kag Valderrama sa Antique.
Diri sa Iloilo suno kay Macapobre, ang Maasin kag ang Mina lang ang nakakuha sang above 95% kun hatagay sang Social Amelioration Program ang pagahambalan.
Para naman sa mga nagareklamo nga miyembro sang Pantawid Pamilyang Pilipino Program (4Ps) nga wala sang cash card, ang kwarta ang igaderetso sa ila ATM account.
Sa subong suno kay Macapobre, padal-an anay niya sang sulat ang Land Bank of the Philippines tuhoy diri.
Samtang, para naman sa mga miyembro sang Pantawid Pamilyang Pilipino Program (4Ps) nga wala nalakip sa listahan ukon indi kwalipikado nga benepisyaryo, ginpahayag ni Macapobre nga kinahanglan nga updated ang records sa ahensya.
Ginhalimbawa ni Macapobre ang anak sang 4Ps beneficiary nga sa subong may yara na sang kaugalingon nga pamilya ang indi na kwalipikado nga makabaton sang cash assistance bangud nga isa lang sa tagsa ka pamilya ang dapat nga malakip sa listahan.
Agud nga makabaton sang ayuda, kinahanglan suno sa natungdan nga ipa-update ang records nga nagapamatuod nga may kaugalingon na nga pamilya ang sadto anay anak sang 4Ps beneficiary.
