Tubtub pa las ‘sais karon sa gab-i ang power interruption sa pila ka bahin sa syudad sang Iloilo.
Nagsugod ini ‘las sais kaina sang aga, sandig man sa abiso sang MORE Electric and Power Corporation.
Sa interview sang Bombo Radyo kay Michelle Visera, corporate communication officer sang National Grid Corporation of the Philippines (NGCP), iya ginpahayag nga ginpatigayon ang isa sa mayor nga mga maintenance works sang NGCP sa ila nga 50 MVA Power Transformer.
Bangud sini, gin-hingyo sang NGCP sa MORE Power nga i-shut down anay ang Sta. Barbara Power Barge 69KV bangud sa himuon nga corrections.
Suno kay Visera, ginahimo ini sa kada una nga quarter sang tuig bilang preparasyon man sa pag-abot sang summer kun sa diin ginapanan-aw na nga daku nga mangin mataas ang demand sang kuryente.
Gina-upgrade man ang Iloilo substations bilang preparasyon man sa krtikal nga mga adlaw sa presidential kag local elections.
Ang 12 ka oras nga power interruption ang ma-eksperyensyahan sa bug-os nga Lapaz Substation, City Proper Feeder 2, porsyon sang City feeder 1, bilog nga Jaro substation, bilog nga Mandurriao substation, bilog nga Megaworld substation lakip na ang porsyon sang Brgy. Tabucan kag San Rafael.
