ILOILO CITY – 16 ka mga indibidwal lakip na ang pila ka mga madre sa Rural Missionaries of the Philippines (RMP) ang ginkasuhan bangud sang ginapahayag nga paghatag sang pondo para sa Communist Party of the Philippines (CPP) kag sa New People’s Army (NPA).
Suno kay DOJ incoming spokesperson Mico Clavano, 55 ka counts sang paglapas sang Republic Act 10168 ang ginpasaka batuk sa 16 ka mga akusado sa regional trial court sa Iligan City.
Ang nasambit nga probisyon ang nagapina sa sin-o man nga nagahatag sang pondo ukon financial services sa mga tawo ukon grupo nga natumod ukon gin-designate bilang terorista nga nagadangat sa 40 ka tuig nga pagkapreso kag multa nga P500,000 tubtob P1 million.
Ang Anti-Terrorism Council ang nagkabig sa CPP-NPA bilang terrorism groups sang December 2020.
Wala sang pyansa nga ginrekomendar bangud ang kaso ang non-bailable.
Ang kaso ang ginbase sa testimonya sang duha ka ginapahayag nga anay myembro sang CPP-NPA.
Ang isa nga nagpakilala bilang former finance officer sang RMP ang nagpahayag nga 60% sang pondo nga nagikan sa foreign funders ang ginhatag sa CPP-NPA agud nga ibakal sang armas kag bala.
Ginmandu na sang Court of Appeals ang pag-hold sang tanan nga bank accounts sang RMP kag RMP-North Mindanao Region sa sulod sang 20 ka adlaw kag nag-extend ini sang anum ka bulan.
Ginpahayag man ni Clavano nga ang 16 ka mga indibidwal ang napaslawan nga magpasa sang ila counter-affidavits sa ginpatigayon nga preliminary investigation stage.
