Magalawig sang 10 ka adlaw ang 18th Palayag Festival nga maga-umpisa subong, Enero 10 tubtob Enero 19, 2025.
Ang Palayag Festival ang tuigan nga selebrasyon sang Buenavista, Guimaras bilang paghatag dungog kay Sr. Sto. Niño nga amo ang ila patron saint.
Ang tema sang festival subong nga tuig amo ang “Balik Layag: Our history. Our dream. Our future.
Sa interview sang Bombo Radyo kay Jay Lord Saplagio, Tourism Officer sang Buenavista, Guimaras, iya ginpahayag nga madamo sang water activities nga ginpreparahan ang Local Government Unit nga ika-enjoy sang local kag foreign tourists sa magabisita sa lugar.
Nagpasalig naman ang Buenavista-Local Government Unit nga mas madamo pa nga tourist arrivals ang marekord subong nga tuig.
Sang nagligad nga 2024, may yara sang 32,719 same day tourist arrivals nga narekord kag 744 ang nag-overnight stay.
Suno kay Atty. Raymundo Moderes, Liaison Officer sang Buenavista lgu, may 441 ka mga foreign guests ang nagbisita sa Buenavista sang Palayag Festival 2024 sa diin may yara ini tanan sang tourism receipts nga masobra sa P27 million sa same day tourist arrivals kag malapit sa P4 million nga overnight stay.
Ang kabug-usan nga gasto sang Buenavista LGU sang 2024 ang yara sa P7 million.
Nagpasalig man si Buenavista, Guimaras Mayor Samuel Gumarin, ang religious activity ang indi dapat paglaktan sang pamulitika agud mapabilin ang solemnity sini.
Ginpahayag man sini nga sabton niya ang tanan nga mga akusasyon nga ginahaboy batok sa ila kon magsugod na ang election period kag indi subong nga Palayag Festival.
