ILOILO CITY- Nagpaandam ang Local Economic Enterprise Office (LEEO) sa mga vendors ukon mga indibidwal nga nagapalusot sang hot meat sa mga merkado publiko sa Iloilo City.
Ini kasunod sang na-intercept nga 231 kilos nga cara beef nga makabig hot meat bangud wala ini nag-agi sa husto nga proseso.
Sa interview sang Bombo Radyo kay Maricel Mabaquiao, head sang LEEO, iya ginpahayag nga isa ka vendor ang nagpalusot sang hot meat sa Iloilo Terminal Market kag wala ini sang may mapakita nga Meat Inspection Certificate nga nagakahulugan nga wala ini gin-ihaw sa Iloilo City Slaughter House rason nga indi ini safe kaunon.
Suno kay Mabaquiao, isa sa mga konsekwensya nga mahimo atubangon sang mga vendors nga nagapalusot sang hot meat amo nga mahimo nga dumilian na sila nga makabaligya sa mga merkado sa syudad.
Ginpasiguro naman sang Local Economic Enterprise Office kaupod ang National Meat Inspection Service Region VI nga regular sila nga nagapatigayon sang inspeksyon sa tanan nga merkado para mapat-ud ang kalidad sang mga ginabaligya nga karne.
