ILOILO – Nagalaum si Iloilo Governor Arthur Defensor Jr. nga katapusan na nga batch sang Locally Stranded Individuals ang masobra 50 ka mga pasahero sang barko gikan Cebu ng nag-abot sa syudad sang Iloilo.
Sa interview sang Bombo Radyo kay Atty. Suzette Mamon, Provincial Administrator, iya ginpahayag nga 24 sa mga nagpauli ang tumandok sang probinsya sang Iloilo kag yara na sa subong sa mga quarantine facility.
Suno kay Mamon, indi anay magbaton sang Locally Stranded Individual gikan sa Cebu kag sa iban pa nga mga lugar nga nagapanguna sa COVID-19 cases.
Ginpahayag ni Mamon nga sa probinsya sang Iloilo, duha ang entry points sang Locally Stranded Individuals apang kun sa airport, 1,500 lamang sa tagsa ka semana ang pahanugutan nga makapauli.
Nahibalu-an nga ang inbound flights ang limitado lamang sa Metro Manila apang may yara naman sang existing order ang Department of the Interior and Local Government nga ipauntat anay ang byahe sang barko gikan kag padulong sa Cebu nga may yara sang madamo nga kaso sang COVID-19.
May kaangtanan naman sa isa ka COVID-19 patient sa banwa sang Dueñas, ginpahayag ni Mayor Mamerto Pelopero III nga wala sang dapat kahangaw-an bangud nga ang Locally Stranded Individual ang ginderetso sa quarantine facility.
Suno kay Pelopero, ang nasambit nga pasyente ang naghalin sa Cebu kag nag-abot sa syudad sang Iloilo sang Hunyo 12 sakay sa barko.
Hunyo 15 na suno kay Pelopero sang nakumpirma nga COVID-19 positive ang 22 anyos nga Locally Stranded Individual.
Ginpahayag sang natungdan nga magapabilin sa quarantine facility ang nasambit nga pasyente tubtub magnegatibo sa nasambit nga virus.
