Patay ang 24 ka mga tawo matapos nga nag-collapse ang parte sang highway sa probinsya sang Guangdong sa China kasunod sang mabaskog nga pag-ulan.
Bangud naghumok ang duta kag natiphag, 20 ka mga salakyan ang na-trap kun sa diin 54 tanan ka mga tawo ang involved.
Magluwas sa mga napatay, 30 ka iban pa nga mga tawo ang gindala sa ospital apang subong estable naman ang mga kondisyon.
Nagbuligay naman ang malapit 500 ka mga tawo sa site nga nag-collapse para makapatigayon sang rescue operation.
Ini nga insidente amo ang pinakaulihi sa sunod-sunod nga natabo nga naangot sa malain nga tyempo sa Guangdong sa sulod na sang pila ka sinemana.
Sang nagligad nga bulan, apat man ka mga tawo ang patay sa pagbaha samtang sang nagligad nga semana, lima ka tawo ang patay sa buhawi sa Guangzhou. Indi normal ang pagbubo sang ulan sini nga tyempo sa China kag ginaangot man sa nagalala man nga climate change. (Photo: Xinhua News Agency/AP)
