PASSI CITY – Ginhingyo na ni Passi City Mayor Stephen Palmares nga ipaidalom sa swab test ang tatlo ka mga persona nga naka-angkon sang close contact sa mag-asawa nga nagpositibo sa Coronavirus Disease 2019 (COVID-19) sa Pavia, Iloilo.
Sa interview sang Bombo Radyo kay Palmares, iya ginpahayag nga wala sang dapat nga kahangaw-an ang publiko bangud nga gilayon nga nagpatigayon sang contact tracing sa mga naka-angkon sang close contact sa duha ka pasyente.
Suno kay Palmares, nagapabilin nga asymptomatic ang tatlo kag ginapaidalom sa strict home quarantine lakip na ang ila mga pamilya.
Ginpahayag ni Palmares nga indi gilayon magpati sa mga impormasyon sa social media kag sa sabaylo, dapat nga bantayan ang anunsyo sang Department of Health kag sang Local Government Unit sang Passi City para sa dugang nga detalye kun COVID-19 ang pagahambalan.
