Ginpatung-an na sang pwersa sang kapulisan ang ginamo nga natabo sa University of California in Los Angeles (UCLA) campus sa Estados Unidos sang Amerika matapos nga gin-atake sang Israeli supporters ang kampo nga gintukod sang pro-Palestinian protesters.
Sa footages nga nagguwa, makit-an nga may bitbit nga mga stick kag tubo ang iban nga tawo agud nga gub-on ang nga boards nga amo naman ang ginhimo sang pro-Palestinian protesters nga makeshift barricade.
May mga lalaki naman nga counter-demonstrators nga naka-maskara kag maathag nga mas tigulang sangsa mga estudyante. Sila ang nagpanghaboy sang mga gamit agud nga gub-on man ang barikada nga ginhimo sang pro-Palestinians.
Sa New York, ginkakas ang protest encampment kag gin-aresto ang yara sa 300 ka mga pro-Palestinian demonstrators nga nagtinir sa building sa Columbia University.
Nagsaka pa ang police officers sa bintana sa ikaduha nga panalgan sang Hamilton Building nga amo ang gina-okupar sang mga nagaprotesta halin pa sang Martes.
Samtang nga ginakarga ang detainees sa bus, padayon sa pagsinggit ang protesters sang “Free, free, free Palestine!” samtang may iban naman nga nagasinggitan nga hilwayon ang mga estudyante.
Naghingyo man ang university president nga patiniron ang pulis tubtub sa Mayo 17 ukon duha ka adlaw matapos ang graduation agud nga mapabilin man ang kalinong sa eskwelahan kag masigurado nga indi na masulit ang pagtukod sang protesters sang kampo sa sulod sang unibersidad.
Ini nga masangkad ang protesta sang mga estudyante sa Amerika ang kasunod sang mas nagasangkad man nga Israel-Hamas war sa Middle East kun sa diin linibo na ka mga sibilyan ang napatay sa Gaza kag mas ginakahangaw-an nga magdamo pa kun padayunon sang Israel ang ground offensive sa syudad sang Rafah nga amo ang ginatiniran sang kalabanan nga mga pumuluyo.#
(Photo: WDET)
