Gindugang ang 37 ka Chinese entities sa trade blacklist sang Estados Unidos sang Amerika bangud sa national security concerns.
11 sa sini nga numero ang gin-akusahan nga naangot sa ginasuspetsahan nga spy balloon nga ginpalupad sa sensitive areas sang United States sang nagligad nga tuig.
Ginadumilian sila nga makig-negosyo sa iban nga US firms kag dapat anay nga magkuha sang Commerce Department approval antes makabaton sang goods kag technologies halin sa amo nga nasyon.
Ini nga entities ang nagalakip sa mga kumpaniya kag research institutions.
Sa 37 entities, 22 ang naangot sa tikang sang China nga i-improve ang quantum technology kag pag-angkon sang US-origin items agud mapasangkad pa ang quantum capabilities sang ila pungsod.
Ang iban sa ila ang naangot man sa advancements sa nuclear programs sang China ukon na-involve sa export sang controlled items sa Russia kasunod sang gyera sa Ukraine.
“Today’s action is another decisive step in addressing challenges posed by the People’s Republic of China and its military modernization,” suno sa statement ni Undersecretary of Commerce for Industry and Security Alan Estevez.
Dapat suno sa iya nga magpabilin nga vigilante ang Amerika kag balabagan ang mga entities nga maka-access sa teknolohiya sang US nga pwede man magamit kontra sa ila nga national security.
Matandaan nga Pebrero sang nagligad nga tuig sang na-detect sa teritoryo sang Amerika ang isa ka daku nga balloon nga gindudahan nga espiya. Ang amo nga insidente ang nangin flashpoint sa tunga sang US kag China rason nga sang amo nga tion, gin-postpone gid ang byahe kuntani ni US Secretary of State Antony Blinken sa Beijing.#
