Masobra na sa 50% sang mga personnel sang 3rd Infantry Division sang Philippine Army ang nakaboto para sa national and local elections.
Nag-umpisa ang local absentee voting (LAV) sang Myerkules, Abril 27, kag magatakop na buwas, Abril 29.
Sa interview sang Bombo Radyo kay Captain Kim Apitong, spokesperson sang 3rd Infantry Division, iya ginpahayag nga 1,186 tanan ka 3ID personnel ang nag-signify nga magaboto sa tatlo ka adlaw nga LAV.
Ginpatigayon ang pagboto sa Camp Macario Peralta sa Jamindan, Capiz kun sa diin yara ang Provincial Election Supervisor sang probinsya sang Capiz kag yara man si 3rd ID commander Major General Benedict Arevalo.
May yara man sang polling precinct sa 301st Infantry Bayanihan Brigade sa Camp Hernandez sa Dingle, Iloilo.
Gin-athag man ni Apitong nga may mga myembro sang Philippine Army nga indi man direkta nga maga-bantay sa eleksyon gani pwede man sila makapadulong sa polling places sa Mayo 9 kag magboto. ##
