ILOILO CITY- Nagdangat na sa 41 ka mga barangay sa Western Visayas ang apektado sang Super Typhoon Egay kag enhanced southwest moonsoon.
Sa interview sang Bombo Radyo kay Ms. Cindy Ferrer, spokesperson sang Regional Disaster Risk Reduction and Management Council VI, iya ginpahayag nga kalabanan sa sini nga mga barangay nga apektado ang ginbaha.
Sa data sang talatapan, yara sa 4, 066 ka mga pamilya ang apektado nga ginabug-usan sang 17, 223 nga mga indibidwal.
Suno kay Ferrer, madamo sang mga apektado nga residente ang wala nagtinir sa mga evacuation centers kag ginpahanugutan nga magbalik sa ila mga panimalay bangud nga madasig man nga nag-subside ang tubig.
Apektado naman sang landslide ang pila ka mga lugar sa Sebaste, Tibiao, kag Patnongon sa Antique; kag Hinoba-an sa Negros Occidental.
Nagapadayon man suno sa natungdan ang ginahatag nga bulig nagikan sa Department of Social Welfare and Development Region VI magluwas pa sa assistance nagikan sa mga local government units.
