ILOILO CITY- Naglab-ot sa 16 ka mga pamilya ukon 68 ka mga indibidwal ang ginpang-evacuate sa bulig sang mga personnel sang Bureau of Fire Protection bangud sa mataas nga tubig-baha sa Camalig, Jaro, Iloilo City.
Sa interview sang Bombo Radyo kay FSupt Melanie Habawel, Fire Marshall sang Iloilo City Fire Station, iya ginpahayag nga may mga evacuees man sa Dungon B, Jaro.
Ginpangdala man gilayon ang apektado nga residente sa barangay hall kag gymnasium.
Samtang, base sa data sang City Disaster Risk Reduction and Management Office, sa kabilugan naglab-ot na sa 70 ka barangay ang nabahaan, 1634 ang mga evacuees, 30 ang damaged houses kun sa diin 27 ang partially damaged kag tatlo ang totally destroyed.
Sa interview sang Bombo Radyo kay Donna Magno,head sang opisina, padayon nga naka-standby ang ila mga personnel sa nanuhay-tuhyay nga command centers sa palibot sang syudad para madasig nga marespondehan ang mga areas kag pumuluyo nga kinahanglan sang ila bulig.
