ILOILO CITY- Naglab-ot sa pito ka mga balay ang ginlamon sang kalayo sa natabo nga sunog sa Villa Carolina Subdivision, Brgy. Yulo Drive, Arevalo, Iloilo City.

Lima ang totally burned kag duha naman ang partially burned sa nagkalasunog nga mga puluy-an.

Ang totally burned nga mga balay ang ginapanag-iyahan nanday Julius Pancho, Jobert Pancho, Ma. Elena Pancho, Paulo Pancho, kag Ernesto Pancho.

Ang partially burned naman nga mga balay ang ginapanag-iyahan nanday Rodima Militante kag Fanny Valera.

Sa interview sang Bombo Radyo kay Leslie Pancho nga asawa ni Julius Pancho, iya ginpahayag nga nakatapos lang gid sila panyaga kag nakahalin lang gid sa ila balay agud idul-ong ang iya bata sa eskwelahan sang natabo ang sunog.

Suno kay Pancho, nagdali-dali ini balik sa ila balay agud magsalbar sang gamit kag ang nadala lamang niya amo ang pila ka mga bayo kag importante nga mga dokumento.

Pahayag ni Pancho, nadala man sa sunog ang bag-o lamang na-release nga kwarta nga halin sa Pantawid Pamilyang Pilipino Program kag amo man ang kwarta nga ginatago-tago sang iya kabataan nga ila nabaton sang Paskwa.

Padayon pa nga ginaimbestigaran ang kabangdanan sang nagluntad nga sunog.