Transport operators nga nag-upod sa strike, may show cause order – LTFRB

ILOILO CITY – Ipanagtag na subong nga semana sang Land Transportation Franchising and Regulatory Board (LTFRB) ang show cause order sa mga Transport Groups nga nag upod sa Nationwide Transport Strike sang Lunes.
Sa interview sang Bombo Radyo Iloilo, ginpahayag ni Atty. Jomarie Lamparero, legal counsel kag tagpamaba sang LTFRB Region 6, ipadala nila ang show cause order sa mga operators kag pangayuan ang mga ini sang paathag sa pag-upod sa untat byahe.
Ginpahayag ni Lamparero nga sa tion nga indi mapaathag sang mga operators ang ila pag-upod sa nationwide transport strike, mahimo sila nga multahan kag kanselahon ang prangkisa sang mga ini.
Apang gin-athag sang abogado nga may mga remedy pa man nga ihatag sa mga operators kag ila man pamatian ang bahin sang mga ini antes dagdagan sang sanction.