ASEAN Ministerial Meeting sa Iloilo, ginsugdan na

ILOILO CITY – Ginsuguran na ang 22nd Senior Officials Meeting for the ASEAN Socio-Cultural Community (ASSC) at 17th ASEAN Socio-Cultural Community (ASCC) Council Meeting diri sa siyudad sang Iloilo.
Alas-9:00 sang aga ginpatigayon ang opening ceremony sa Iloilo Convention Center (ICC) nga amo ang venue sang isa ka semana nga pagtililipon.
Ginsundan ini sang photo opportunity sa mga delegates samtang karon sa gab-i hatagan sang welcome dinner ang mga delegado.
Kadungan sini, nag-apelar si Iloilo City Mayor Jed Patrick Mabilog sa mga Ilonggo nga suportahan ang pag-host sang siyudad sang nasambit nga meeting.
Isa ini ka dungog para sa Iloilo City suno kay Mabilog, kag gin-ako nga mas organisado ang pag-host sang siyudad sang ASEAN Ministerial Meeting kaysa pag-host sang siyudad sang APEC meeting sadto.
Suno sa alkalde, ang pagpanikasog sang Iloilo City nga magmadinalag-on ang ASEAN Ministerial Meeting agud ipakilala ang Iloilo nga malinong nga lugar.
Ginpahayag naman ni Police Regional Office 6 (PRO-6) director Chief Supt. Jose Gintiles nga handum nila ang zero AEAN-related incident.