Rep. Trenas, ginpanginwala ang akusasyon nga plano ipa-patay ang city councilor

ILOILO CITY – Ginpanginwala ni Iloilo City Rep. Jerry Trenas nga ginmando niya ang pagpa-patay kay City Councilor Plaridel Nava.
Sa exclusive interview sang Bombo Radyo kay Treñas, ginpahayag sini nga wala siya sang ihibalo sa mga ginapasibangod sa iya.
Suno pa sa kongresista, halin sang una, wala gid ini sang may ginpa-sakit ukon ginpa-patay kag nagapati nga may nagapaaway lamang sa ila sang konsehal.
Gindugang pa sang mamalidha nga wala man ini sang may nakita nga rason pulitika tungod nga nagpahayag na ini sang pagretiro sa panghimanwa.
Ginkuwestiyon man ni Treñas kun nga-a subong lang naggawa ang isyu sa diin natapos na ang eleksiyon kag patay na ang drug lord nga si Melvin Odicta.
Samtang, posible may kaangtanan ang mga nabaton nga death threats ni Rep. Treñas sa pagtudlo sa iya nga amo ang mastermind sa likod sang tuyo nga ginaalegar pagpa-patay kay Councilor Nava.
Sa interview sang Bombo Radyo, ginpahayag sang kongresista nga tatlo ka semana antes ang paggwa sang impormasyon tuhoy sa pagpa-patay kay Nava, nakabaton na ini sang mga death threats.
Wala man ini sang ideya kung sin-o ang nagatuyo sang iya kabuhi kag gindangop na ini sa National Bureau of Investigation (NBI) kag sa PNP.