ILOILO CITY – Kulang sa ‘common sense’ ang tatlo ka mga pulis nga nagmaoy sa sulod sang isa ka club sa syudad sang Iloilo.
Sa interview sang Bombo Radyo kay Atty. Joseph Celis, Regional Director sang National Police Commission (NAPOLCOM) 6, iya ginpahayag nga may yara sang Executive Order nga ginpaguwa si Presidente Rodrigo Duterte nga nagadumili sa mga pulis nga mag-inom kag mag-eskandalo sa mga club ukon pampubliko nga lugar, magbulang ukon magsugal.
Ginakabig ni Celis nga ‘act of stupidity’ ang natabo bangud nga kasubong nga wala nakahangop ang tatlo ka mga pulis sang executive order nga ginpirmahan sang presidente.
Para sa NAPOLCOM Regional Director, nagakadapat nga ihingadlan sang Philippine National Police (PNP) kun sanday sin-o ang tatlo ka mga pulis nga nagmaoy sa club bangud nga kinamatarong sang publiko nga mahibalu-an ang mga nagakatabo sa palibot.
Ang paghingadlan sa tatlo ka mga pulis suno kay Celis ang indi man makabig nga pagpakahuya bangud nga makabig nga isa ka ‘news worthy’ event ang natabo.
Sa pihak sini, ginpahayag sang natungdan nga indi pa siya makapaguwa sang komento tuhoy sa padangatan sang tatlo ka mga pulis bangud nga ang kaso ang wala maturn-over sa NAPOLCOM.
