Gintawag nga uyaya sang asosasyon sang mga mangunguma ang Provincial Government bangud wala gihapon mahatag ang ayuda para sa kahalitan nga natuga sang El Niño sa ila.
Sa interview sang Bombo Radyo Iloilo kay Lucia Capadusio sang Federation of Iloilo Farmers Association,iya ginpahayag nga dismayado sila bangud wala sa gihapon sang klaro nga sabat ang kapitolyo kun ano nga bulig ang ihatag sa mga mangunguma.
Suno kay Capadusio, nagpadulong na sila sa provincial capitol agud manukot sang bulig nga ginpangako sa ila.
Suno sa iya, sang ila ginpamangkot si Dr. Jerry Bionat, pinuno sang Provincial Disaster Risk Reduction and Management Office(PDRRMO), wala ini sang pat-ud nga sabat kun san-o maaprubahan ang budget para sa mga mangunguma nga ginpasulod sa Annual Investment Plan nga ara pa subong sa Sangguniang Panlalawigan.
Gindugang pa sang natungdan nga kun wala sila nagpadulong sa kapitolyo kahapon, wala sila nakahibalo nga ang napartiniser para sa ila ang para lang sa abono kag patubig apang wala madala ang bugas kag binhi nga ila lubos nga ginakinahanglan.
