ILOILO CITY – Na break sang Bombo Radyo Iloilo ang kaugalingon nga rekord nga may pinakamadamo nga naserbisyuhan subong nga tuig humalin sang nag umpisa ang Bombo Medico.
Nahibaluan nga naglab-ot sa 7,573 ka mga pasyente ang nahatagan sang bulig medical, optical kag dental sa ginpatigayon nga Bombo Medico 2019 sa Iloilo Science and Technology University sa Burgos St., Lapaz, Iloilo City.
Ini ang mas mataas kun ipanggid sa narekord sang naligad nga tuig nga nagdangat lang sa 7, 348.
Suno kay Bombo Roger Gencianeo, Station Manager sang Bombo Radyo Iloilo iya ginpahayag nga madamo na naman sang nabuligan nga mgaa pumuluyo ang Bombo Medico 2019 nga ginhiwat sa Iloilo Science and Technology University (ISAT-U) sa Burgos Lapaz Iloilo City sa diin nakabatun sang serbisyo edical, optical, dental, kag iban pa ng special services ang mga nagkaladto.
Suno kay Bombo Roger, sa sini nga tuig mas nagadamo ang mga tawo nga nagkadto agud mag-avail man sang nagkalain-lain nga serbisyo.
Makita man suno sa iya ang kalipay sa nawong sang mga kabataan partikular na sang nagpatigayun sang pahampang kag nakabatun sang toys ang mga kabataan nagikan man sa Philippine Army nga isa sa ma nangin partners sang Bombo Radyo Iloilo sa nasambit nga aktibidad.
Ginpasalamatan man ni Bombo Roger ang tanan nga mga doctors, volunteer nurses, assistants, kag iban pa nga nangin partners sang Bombo Radyo agud mangin isa na naman ka madinalag-on nga aktibidad ang Bombo Medico 2019.
Ang kadamuon sang mga tawo nga nagkadto sa nasambit nga aktibidad ang nagapakita suno kay Bombo Roger sang pagpalangga sang tagsa-tagsa sa Bombo Radyo nga nangin kabahin na sang ila pagpangabuhi.
