Wala sa gihapon natandog ang share sang Iloilo Provincial halin Small Town Lottery sa probinsya sang Iloilo.
Sa interview sang Bombo Radyo kay Iloilo Provincial administator Atty. Suzette Mamon iya ginpahayag nga yara sa gihapon sa Provincial Treasurer’s office ang nasambit nga share kag ini ang na proseso na sang tyempo pa ni anay Iloilo Governor Arthur Defensor Sr.
Apang indi pa ini mahimo nga ma-disburse bangud wala pa napirmahan ang Memorandum of Agreement nga ginpadala sa central office sang Philippine Charity Sweepstakes Office.
Nakabutang sa memorandum of agreement ang mga sektor sa probinsya sang Iloilo nga posible makagamit sang nasambit nga share.
Nahibaluan nga nagalab-ot sa duha tubtob tatlo ka milyon ang share sang probinsya sang Iloilo halin sa small town lottery.
Suno kay Mamon ma-utilize ang share sa mga charitable purposes, medical needs sang mga pumuluyo kag sang mga indigents.
Dugang pa sang natungdan mahimo man kuntani nga magamit ang nasambit nga share subong nga tinion may kaangtanan sa pagduging sang kaso sang Dengue Hemmorhagic Fever.
Ginpahayag ni Mamon nga mahimo madisburse ang share sang probinsya kun mapirmahan na sang central office sang Philippine Charity Sweepstakes Office ang nasambit na memorandum of agreement.
Sa subong gina preparahan nila sa liwat ang bag-o nga memorandum nga ipasa nila sa central office sang Philippine Charity Sweepstakes Office agud madisburse na ang nasambit nga kwarta.
