ILOILO CITY– Wala na sang extension ang plaso nga ginhatag ni Iloilo City Mayor Jerry Treñas sa bar owners nga magtuman sa requirements sang Executive Order 46 kadungan sang pagdula sang Liquor Ban.
Sa interview sang Bombo Radyo kay Mr. Norman Tabud, pinuno sang Business Permit and Licensing Office, iya ginpahayag nga wala na sang may ihatag pa nga extension sa tanan nga bar owners.
Suno kay Tabud, magasugod na ang inspection subong nga gab-i sa tagsa ka bar, night club, disco bars kag iban pa nga commercial establishment nga nagabaligya sang makahulubog nga ilimnon.
Ginpahayag ni Tabud nga lakip sa magabug-os sa inspection team amo ang Task Force and Moral Values and Formation, Transportation Management and Traffic Regulation Office, Public Safety and Transportation Management Office kag katapo sang Philippine National Police.
Nahibaluan nga dapat may yara sang bouncer ang tagsa ka bar, magapatigayun sang hugot nga pagrikisa sa customers nga nagasulod, may functional nga Closed Circuit Television Cameras, pagdumili sa pagbaligya sang makahulubog nga ilimnon sa mga minor de edad kag amo man sa mga tuman na kahubog nga customer.
Mangin ‘One Strike Policy’ ang ipatuman sa diin ang mga magalapas sa ginpaguwa nga pagsulundan ang gilayon nga bawi-an sang permit to operate.
