ILOILO– Indi na madayon ang gina plano nga pagpatigayon sang hublag protesta sang mga sidewalk vendors may kaangtanan sa pagpahalin sa ila sa mga pwesto nila sa sidewalks.
Sa interview sang Bombo Radyo kay Jimmy Durado, federation president sang Iloilo City Sidewalk Vendors Association iya ginpahayag nga nahisugtan na nila sang mga kaupod niya nga sidewalk vendors nga indi na pagdayunon ang pagpatigayon sang hublag protesta bangud na apresyar nila ang konsiderasyon nga gina hatag sa ila sang City government kaangay nalang sang paghatag sa ila sang alternatibo nga lugar nga pahamtangan sang ila nga mga baligya.
May kaangtanan naman sa ginapahayag P100 nga nagakadapat nila baydan kada bulan sa tion nga makahalin na sila sa Cacho property, ginpahayag ni Durado nga indi pa sya makahatag sang sabat kun ano ang nangin kasugtanan nila sang mga vendors bangud wala pa nila ini naistoryahan.
Apang sa subong suno sa natungdan, luyag nila kun tani nga mangayo sang gamay nga konsiderasyon sa nasambit nga balaydan bangud mabug-at ini para sa ila kag indi pa sila sigurado kun mangin maayo ang mangin baligya-anay nila sa bag-o nga lugar.
Samtang may kaangtanan naman sa mga nag reklamo nga mga ati matapos nga wala sila gin tugutan nga magbaligya sa Cacho property, ginklaro ni Durado nga bukas sa tanan nga mga vendors ang nasambit nga lugar.
Dugang sang natungdan, tinghuaan nila nga buligan ang mga ati nga maka kuha sang pwesto agud makapahamtang sang ila mga baligya sa sulod sang Cacho property.
